Дисней 2026 он гэхэд AI-тулгуур сурталчилгаа, босоо видео руу шилжинэ
“The Walt Disney Company” Global Tech & Data Showcase арга хэмжээндээ 2026 он гэхэд босоо видео формат болон хиймэл оюунд суурилсан медиа төлөвлөлтийг зар сурталчилгаандаа бүрэн нэвтрүүлэх зорилтоо танилцууллаа. Энэ нь хэрэглэгчийн дадал, технологийн өөрчлөлтөд дасан зохицох стратегийн алхам гэж компанийнхан үзэж байна.
- 2026 оноос босоо видео формат, “AI-aided media planning” бүрэн хэрэгжинэ.
- Disney+, Hulu, ESPN+ зэрэг платформ даяарх өгөгдөлд түшиглэсэн оновчлол хийгдэнэ.
- Одоо буй контентын санг босоо формат руу автоматаар хөрвүүлэх технологи хөгжүүлж байна.
- Хэрэглэгчийн төхөөрөмжид тохируулан сурталчилгаа босоо/хэвтээ хэлбэрээр автоматаар харагдана.
- Стратеги нь уламжлалт ТВ-гээс гадна дижитал, сошиал зарын өрсөлдөөнд байр сууриа бэхжүүлнэ.
Гол асуудал: Яагаад босоо видео, хиймэл оюун чухал вэ?
Контентын хэрэглээ ухаалаг утсанд төвлөрч, босоо үзэх хэв маяг эрчимтэй өсөж байна. TikTok, Instagram Reels, YouTube Shorts-ийн өсөлт энэ чиг хандлагыг нотолж буй бөгөөд Дисней стриминг экосистемдээ уг форматыг нутагшуулж, сурталчлагчдад илүү оновчтой хүрэх зорилго тавьжээ.
Нөгөө талд, хиймэл оюун их хэмжээний өгөгдлийг боловсруулж, зорилтот хүрэлцээ, цаг, платформ, бүтээлч хэлбэрийн шийдлийг урьдчилан тооцоолох боломж олгодог. Ингэснээр зар сурталчилгаанд зарцуулсан хөрөнгийн өгөөжийг нэмэгдүүлэх нөхцөл бүрдэнэ.
Босоо видео: Хэрэглэгчидтэй ойртох алхам
Дисней компанийн зар сурталчилгааны технологийн дэд ерөнхийлөгч Жеми Пауэрс “Бидний зорилго бол үзэгчид хаана байна, тэнд нь хүрэх явдал. Өнөөдөр тэд гар утсан дээрээ, босоо дэлгэц дээр байна” хэмээн онцолжээ.
Компанийн хувьд зөвхөн шинээр босоо форматтай контент бүтээхээс гадна, одоо байгаа кино, нэвтрүүлгийн сангаасаа босоо формат руу автоматаар хөрвүүлэх технологи хөгжүүлж байна. Энэ нь сурталчлагчдад алдартай контентуудтай уялдсан, сошиал орчинд анхаарал татахуйц байдлаар бүтээгдэхүүнээ хүргэх боломж нээнэ.
Жишээлбэл, Hulu дээр кино эхлэхийн өмнөх богино сурталчилгааг хэрэглэгчийн үзэж буй төхөөрөмжид нийцүүлэн босоо эсвэл хэвтээ форматаар автоматаар харуулах шийдэл төлөвлөгдөж байна.
Хиймэл оюун: Өгөгдөлд суурилсан оновчтой төлөвлөлт
Диснейн зар сурталчилгааны бизнес эрхэлсэн захирал Рита Феррогийн хэлснээр, “Бидний эзэмшиж буй хэрэглэгчийн өгөгдөл бол бидний хамгийн том хөрөнгө. Харин хиймэл оюун бол энэ хөрөнгийг үнэ цэнтэй, бодит үр дүн болгон хувиргах түлхүүр юм.”
Тус компани Disney+, Hulu, ESPN+ болон бусад платформуудаас цуглуулсан нэр нь үл мэдэгдэх үзэлтийн өгөгдлийг нэгтгэсэн “Disney’s Audience Graph”-ийг ашигладаг. Хиймэл оюунд суурилсан шинжилгээ нь сурталчлагчдад дараах боломжийг олгоно:
- Зөв зорилтот бүлэгт хүрэх: Спорт сонирхогч, гэр бүлээрээ кино үздэг хүмүүс, эсвэл шинжлэх ухааны уран зөгнөлт кинонд дурлагсад гэх мэт сегментүүд рүү чиглүүлэх.
- Үр дүнг урьдчилан таамаглах: Кампанит ажлын гүйцэтгэлийг эхлэхээс нь өмнө тооцоолох.
- Төсвийг оновчтой хуваарилах: Зарцуулсан доллар бүрийн өгөөжийг (ROI) нэмэгдүүлэх.
Энэхүү хандлагыг “AI-aided media planning” гэж нэрлэж байгаа бөгөөд хүний оролцоог бууруулж, шийдвэр гаргалтыг хурдан, нарийвчлалтай болгохыг зорьдог.
Дүгнэлт
Диснейн 2026 он хүртэлх бодлого нь контентын хэлбэр гар утасны босоо хэрэглээнд нийцэж буйг, мөн өгөгдөл ба хиймэл оюун зар сурталчилгааны үр ашгийг шинэ түвшинд хүргэж буйг харуулж байна. Энэ стратеги нь компанийг контент бүтээгчээс гадна технологид суурилсан медиа тоглогч болгон хөгжүүлж, зар сурталчилгааны зах зээлд Google, Meta зэрэг компаниудтай өрсөлдөх суурь болж байна.
Эх сурвалж: Marketing Brew